ठाण्यातील गावदेवी मंडई येथे झालेल्या भीषण आग दुर्घटनेत अग्निशमन दलातील दोन जवानांचा मृत्यू झाला होता. या घटनेनंतर अग्निशमन विभागातील अपुऱ्या मनुष्यबळाचा मुद्दा गंभीरपणे समोर आला. याच पार्श्वभूमीवर ठाणे महानगरपालिकेने अग्निशमन दल आणि अभियांत्रिकी विभागातील रिक्त पदे भरण्याचा महत्त्वपूर्ण निर्णय घेतला आहे.
सध्या ठाणे महानगरपालिकेच्या अग्निशमन दलासाठी 835 पदे मंजूर असली तरी प्रत्यक्षात केवळ 325 अधिकारी आणि कर्मचारी कार्यरत आहेत. त्यामुळे विभागावर अतिरिक्त कामाचा ताण येत असून आपत्कालीन परिस्थितींना सामोरे जाण्यास अडचणी निर्माण होत आहेत. ही परिस्थिती लक्षात घेऊन एकूण 601 पदांसाठी भरती प्रक्रिया सुरू करण्याचे आदेश देण्यात आले आहेत.
दोन दिवसांत जाहिरात प्रसिद्ध होणार
महापालिका आयुक्त सौरभ राव यांनी दिलेल्या माहितीनुसार, अग्निशमन व अभियांत्रिकी विभागातील भरतीसाठी पुढील दोन दिवसांत अधिकृत जाहिरात प्रकाशित केली जाईल. जाहिरात प्रसिद्ध झाल्यानंतर अवघ्या तीन महिन्यांच्या कालावधीत संपूर्ण भरती प्रक्रिया पूर्ण करण्याचे नियोजन करण्यात आले आहे.
राज्य शासनाच्या मंजुरीनुसार ही भरती प्रक्रिया राबवण्यासाठी टीसीएस कंपनी महापालिकेला तांत्रिक सहाय्य करणार आहे. काही प्रशासकीय आणि तांत्रिक कारणांमुळे भरती प्रक्रिया विलंबित झाली होती. मात्र आता संबंधित यंत्रणांसोबत आवश्यक चर्चा पूर्ण झाली असून पूर्वीच्या जाहिरातीनुसारच भरती प्रक्रिया वेगाने राबवली जाणार असल्याचे आयुक्तांनी स्पष्ट केले.
महिनाभरात फायर सेफ्टी ऑडिट
महापालिकेच्या सर्वसाधारण सभेत नगरसेवकांनी विविध शासकीय इमारती, शाळा, रुग्णालये आणि बाजारपेठांमधील अग्निसुरक्षेचा मुद्दा उपस्थित केला. यानंतर महापालिकेच्या सर्व महत्त्वाच्या इमारतींचे फायर सेफ्टी ऑडिट पुढील एका महिन्यात पूर्ण करण्यात येणार असल्याची घोषणा करण्यात आली.
याशिवाय आग प्रतिबंधक उपाय अधिक प्रभावी करण्यासाठी नियमित मॉक ड्रिल आयोजित करण्यात येणार असून त्यासाठी स्वतंत्र वेळापत्रकही तयार करण्यात आले आहे.
शहीद जवानांच्या कुटुंबियांना दिलासा
गावदेवी मंडई आग दुर्घटनेत प्राण गमावलेल्या दोन अग्निशमन जवानांच्या कुटुंबीयांना अनुकंपा तत्त्वावर नोकरी देण्याची प्रक्रिया सुरू करण्यात आली आहे. तसेच शहरात नवीन फायर स्टेशन उभारणे, अग्निशमन वाहनांची संख्या वाढवणे आणि विभागाला अत्याधुनिक साधनसामग्रीने सुसज्ज करणे यासाठीही आवश्यक पावले उचलली जाणार असल्याचे प्रशासनाने स्पष्ट केले आहे.
या निर्णयांमुळे ठाणे शहरातील अग्निसुरक्षा व्यवस्था अधिक मजबूत होण्यास मदत होणार असून आपत्कालीन सेवांची कार्यक्षमता वाढण्याची अपेक्षा व्यक्त केली जात आहे.
