Land शेतकऱ्यांचे महसुली प्रश्न जलदगतीने सोडवण्यासाठी आणि ७/१२ उतारा अधिक पारदर्शक, अचूक व अद्ययावत करण्याच्या उद्देशाने महसूल विभागाने ‘छत्रपती शिवाजी महाराज महसूल समाधान शिबिर’ अंतर्गत ‘जिवंत ७/१२ मोहीम’ सुरू केली आहे. या उपक्रमाला चंद्रपूर जिल्ह्यात चांगला प्रतिसाद मिळत असून अनेक वर्षांपासून प्रलंबित असलेली महसुली कामे वेगाने पूर्ण होत आहेत.
२०७ शेतकऱ्यांना मिळाले अद्ययावत ७/१२
या मोहिमेअंतर्गत चंद्रपूर जिल्ह्यातील २०७ शेतकऱ्यांच्या ७/१२ उताऱ्यांवरील वारस नोंदी, आवश्यक दुरुस्त्या आणि इतर त्रुटी दूर करून त्यांना अद्ययावत ‘जिवंत ७/१२’चे वितरण करण्यात आले. त्यामुळे अनेक वर्षांपासून रखडलेल्या महसुली प्रक्रियांना गती मिळाली असून शेतकऱ्यांना मोठा दिलासा मिळाला आहे.
कोणत्या समस्या सोडवल्या जात आहेत?
या विशेष मोहिमेद्वारे पुढील महत्त्वाच्या बाबींवर भर दिला जात आहे.
- मयत खातेदारांची नावे ७/१२ मधून कमी करणे.
- कायदेशीर वारसांची नोंद करणे.
- वारस नोंदी प्रलंबित असलेल्या प्रकरणांचा निपटारा.
- ७/१२ उताऱ्यातील विविध त्रुटी दुरुस्त करणे.
- जुने बोजे व इतर हक्कांतील नोंदी कायदेशीर प्रक्रियेनुसार अद्ययावत करणे.
विधानसभा मतदारसंघनिहाय विशेष शिबिरे
जिल्ह्यात विविध विधानसभा मतदारसंघांमध्ये विशेष महसूल शिबिरांचे आयोजन करण्यात आले. या शिबिरांमध्ये पात्र शेतकऱ्यांना प्रत्यक्ष अद्ययावत ७/१२ उतारे आणि आवश्यक महसुली कागदपत्रांचे वितरण करण्यात आले. ज्या शेतकऱ्यांच्या जमिनीच्या नोंदींमध्ये वारस नोंद, मयत खातेदारांचे नाव किंवा इतर कोणतीही त्रुटी अद्याप प्रलंबित असेल, त्यांनी संबंधित तलाठी कार्यालयाशी संपर्क साधण्याचे आवाहन प्रशासनाने केले आहे.
दोन टप्प्यांत राबवली जात आहे मोहीम
टप्पा १
- मयत खातेदारांची नावे कमी करणे.
- कायदेशीर वारसांची नोंद करणे.
- गावात चावडी वाचनाद्वारे माहिती देणे.
- अर्ज स्वीकारून आवश्यक कागदपत्रांची पडताळणी करणे.
टप्पा २
- खातेदार १८ वर्षांचा झाल्यानंतर ‘अपाक’ शेरा काढणे.
- जुनी तगाई कर्जे आणि इतर प्रलंबित नोंदी कायदेशीर प्रक्रियेनुसार हटवणे.
- ७/१२ मधील ‘इतर हक्क’ विभागातील कालबाह्य नोंदी अद्ययावत करणे.
शेतकऱ्यांना काय होणार फायदा?
या उपक्रमामुळे जमिनीच्या नोंदी अधिक स्पष्ट आणि अद्ययावत होत असल्याने वारसा, कर्ज, पीकविमा, सरकारी योजना, बँक कर्ज तसेच इतर महसुली कामांसाठी शेतकऱ्यांना कमी अडचणींचा सामना करावा लागणार आहे. अनेक वर्षे प्रलंबित असलेली कामे पूर्ण झाल्याने शेतकऱ्यांचा वेळ आणि खर्चही वाचत आहे.
शेतकऱ्यांची प्रतिक्रिया
या मोहिमेचा लाभ घेतलेल्या शेतकऱ्यांनी समाधान व्यक्त करत सांगितले की, पूर्वी महसुली नोंदीतील त्रुटींमुळे अनेक कामे अडकत होती. आता ७/१२ अद्ययावत झाल्याने विविध शासकीय योजनांचा लाभ घेणे, बँक व्यवहार करणे आणि शेतीसंबंधित इतर कामे करणे अधिक सोपे झाले असून पुढील शेती नियोजनासाठीही आत्मविश्वास वाढला आहे.