सध्या सोशल मीडियावर खाद्यपदार्थ आणि भाजीपाला विक्रीशी संबंधित धक्कादायक व्हिडिओ मोठ्या प्रमाणात व्हायरल होत आहेत. विक्रेत्यांकडून होणारा निष्काळजीपणा पाहून नागरिकांच्या आरोग्याचा आणि अन्न सुरक्षेचा प्रश्न पुन्हा एकदा ऐरणीवर आला आहे. अशातच आता एका भाजी विक्रेत्याचा व्हिडिओ चर्चेत आला असून, त्यामध्ये काकड्या हिरव्या रंगाच्या द्रवात बुडवून विक्रीसाठी ठेवल्या जात असल्याचा दावा केला जात आहे. हा व्हिडिओ पाहिल्यानंतर अनेकांनी संताप व्यक्त केला आहे.
व्हायरल व्हिडिओत नेमकं काय दिसतं?
सोशल मीडियावर व्हायरल होत असलेल्या या व्हिडिओमध्ये एक भाजी बाजार दिसून येतो. बाजारात एक भाजी विक्रेता जमिनीवर बसून काकड्या विकताना दिसतो. त्याच्या जवळ हिरव्या रंगाचे द्रव भरलेले भांडे ठेवलेले आहे. व्हिडिओमध्ये तो विक्रेता काकड्या त्या हिरव्या द्रवात बुडवून बाहेर काढताना आणि नंतर विक्रीसाठी ठेवताना दिसत आहे.
काही लोकांच्या मते, काकड्या अधिक ताज्या, चमकदार आणि हिरव्यागार दिसाव्यात यासाठी हा प्रकार केला जात असावा. विशेष म्हणजे, कोणीतरी हा प्रकार मोबाईलमध्ये रेकॉर्ड करत असतानाही विक्रेत्याच्या चेहऱ्यावर कोणतीही भीती किंवा घाई दिसून येत नाही. तो आपले काम सुरूच ठेवतो.
आरोग्याबाबत चिंता वाढली
हा व्हिडिओ समोर आल्यानंतर अनेकांनी अन्न सुरक्षेबाबत चिंता व्यक्त केली आहे. भाज्या किंवा फळे कृत्रिम रंगात बुडवून विकल्यास त्याचा थेट परिणाम ग्राहकांच्या आरोग्यावर होऊ शकतो, असे मत अनेकांनी व्यक्त केले. विशेषतः रसायनयुक्त किंवा कृत्रिम रंगांचा वापर केल्यास त्वचा, पोट आणि इतर आरोग्य समस्यांचा धोका वाढू शकतो.
सोशल मीडियावर संतापाची लाट
हा व्हिडिओ सोशल मीडिया प्लॅटफॉर्म एक्सवरील एका अकाऊंटवर शेअर करण्यात आला आहे. व्हिडिओ व्हायरल होताच अनेकांनी संबंधित विक्रेत्यावर कारवाई करण्याची मागणी केली. काहींनी अन्न व औषध प्रशासनाने अशा प्रकारांवर तातडीने लक्ष देण्याची गरज असल्याचे म्हटले आहे.
यापूर्वीही रेल्वे स्थानकांवरील खाद्यपदार्थांबाबत निष्काळजीपणाचे अनेक व्हिडिओ समोर आले होते. एका व्हिडिओमध्ये जमिनीवर पडलेले वडे पुन्हा ट्रेमध्ये ठेवून विक्रीसाठी दिल्याचा दावा करण्यात आला होता, तर दुसऱ्या व्हिडिओमध्ये समोशांच्या टोपलीवर पाय ठेवून बसलेला विक्रेता दिसला होता. अशा घटनांमुळे नागरिकांमध्ये नाराजी वाढताना दिसत आहे.
प्रशासनाने कारवाईची मागणी
सोशल मीडियावर अनेक युजर्सनी संबंधित प्रकरणाची चौकशी करून दोषींवर कठोर कारवाई करण्याची मागणी केली आहे. ग्राहकांच्या आरोग्याशी खेळ करणाऱ्यांविरोधात कडक पावले उचलण्याची मागणीही जोर धरत आहे.