लेकीच्या शिक्षण-लग्नाची चिंता संपवा! सुकन्या समृद्धी योजनेतून मिळवा थेट ७२ लाख रुपये
लेकीच्या शिक्षणाची आणि लग्नाची चिंता ही प्रत्येक पालकांच्या मनात असते. वाढती महागाई, शिक्षणाचा खर्च आणि लग्नासाठी लागणारा मोठा निधी पाहता योग्य वेळी बचत आणि सुरक्षित गुंतवणूक करणे अत्यंत गरजेचे झाले आहे. अशा परिस्थितीत केंद्र सरकारची सुकन्या समृद्धी योजना ही पालकांसाठी मोठा दिलासा देणारी योजना ठरते. योग्य नियोजन करून या योजनेत गुंतवणूक केल्यास भविष्यात तब्बल ७१ लाख रुपयांहून अधिक निधी उभा करता येऊ शकतो.
सुकन्या समृद्धी योजना ही केंद्र सरकारने २२ जानेवारी २०१५ रोजी ‘बेटी बचाओ, बेटी पढाओ’ या महत्त्वाकांक्षी मोहिमेअंतर्गत सुरू केली. या योजनेचा मुख्य उद्देश म्हणजे मुलींच्या शिक्षणासाठी आणि भविष्यातील लग्नासाठी आर्थिक सुरक्षितता निर्माण करणे. सुरू झाल्यापासून आजपर्यंत या योजनेने यशस्वी ११ वर्षे पूर्ण केली असून, आजही ती मुलींसाठीची सर्वात सुरक्षित आणि विश्वासार्ह बचत योजना मानली जाते. सरकारी हमी, कमी जोखीम आणि चांगला परतावा यामुळे मध्यमवर्गीय कुटुंबांमध्ये ही योजना विशेष लोकप्रिय आहे.
व्याजदराच्या बाबतीत सुकन्या समृद्धी योजना इतर अनेक अल्पबचत योजनांपेक्षा पुढे आहे. सध्या या योजनेवर ८.२ टक्के वार्षिक व्याजदर मिळत आहे, जो पीपीएफसारख्या लोकप्रिय योजनांपेक्षाही अधिक आहे. सरकार दर तिमाहीला या व्याजदराचा आढावा घेते आणि वर्षअखेरीस जमा झालेले व्याज थेट खात्यात जमा केले जाते. दीर्घकालीन गुंतवणुकीमुळे या चक्रवाढ व्याजाचा मोठा फायदा मिळतो.
करसवलतीच्या दृष्टीनेही ही योजना अत्यंत फायदेशीर आहे. सुकन्या समृद्धी योजनेत गुंतवलेली रक्कम आयकर कायद्याच्या कलम ८०C अंतर्गत १.५ लाख रुपयांपर्यंत करमुक्त असते (जुन्या करप्रणालीनुसार). याशिवाय दरवर्षी मिळणाऱ्या व्याजावर कोणताही कर लागणार नाही आणि २१ वर्षांनंतर मिळणारी संपूर्ण मॅच्युरिटी रक्कमही पूर्णपणे टॅक्स फ्री असते. म्हणजेच गुंतवणूक, व्याज आणि मॅच्युरिटी – तिन्ही स्तरांवर करसवलतीचा ‘ट्रिपल’ फायदा मिळतो.
जर एखाद्या पालकाने मुलीच्या जन्मानंतर लगेच सुकन्या समृद्धी खाते उघडले आणि दरवर्षी कमाल मर्यादा म्हणजे १.५० लाख रुपये नियमितपणे जमा केले, तर भविष्यात मोठा निधी तयार होऊ शकतो. दरमहा सुमारे १२,५०० रुपये गुंतवून १५ वर्षे पैसे भरल्यास एकूण गुंतवणूक २२,५०,००० रुपये होते. मात्र खाते २१ वर्षांनी मॅच्युअर होत असल्यामुळे पुढील ६ वर्षे जमा रकमेवर व्याज मिळत राहते. सध्याच्या ८.२ टक्के व्याजदरानुसार, मॅच्युरिटीच्या वेळी मिळणारे एकूण व्याज सुमारे ४९,३२,११९ रुपये इतके होते आणि एकूण रक्कम जवळपास ७१,८२,११९ रुपये होते. ही रक्कम मुलीच्या उच्च शिक्षणासाठी किंवा लग्नासाठी मोठा आधार ठरू शकते.
या योजनेच्या काही महत्त्वाच्या अटी पालकांनी लक्षात घेणे आवश्यक आहे. मुलीच्या जन्मापासून ते ती १० वर्षांची होईपर्यंत सुकन्या समृद्धी खाते उघडता येते. खाते सुरू ठेवण्यासाठी वर्षाला किमान २५० रुपये भरणे बंधनकारक आहे, तर एका आर्थिक वर्षात जास्तीत जास्त १.५० लाख रुपयेच जमा करता येतात. पैसे फक्त १५ वर्षे भरायचे असतात, पण खाते २१ वर्षांनी मॅच्युअर होते. तसेच मुलीच्या १८ व्या वर्षानंतर शिक्षणासाठी जमा रकमेपैकी ५० टक्क्यांपर्यंत रक्कम काढण्याची सुविधा देखील उपलब्ध आहे.
एकूणच पाहता, सुकन्या समृद्धी योजना ही मुलीच्या भविष्यासाठीची अत्यंत सुरक्षित, फायदेशीर आणि दीर्घकालीन बचत योजना आहे. योग्य वेळी गुंतवणूक सुरू केल्यास लेकीच्या शिक्षणाची आणि लग्नाची चिंता मोठ्या प्रमाणात दूर होऊ शकते.